צו פעטער שמואל

(דאס האב איך געשריבן אלס א תשובה אויף א עקאנאמישן אויפוואכונג שאלה לגבי די גאווערמענט, בדרך צחות, ביטע נישט ווייזן פאר די אינסטאנצן…)

דער פעטער איז אין שווערע עקאנאמישע צייטן, און יעדער פרובירט צו העלפן. איך בין א וואוילער בירגער וואס איז מתפלל לשלום מלכות (דאס איז דער זעלבער אנקל סעם פון וועם איך רעד טאקע) בין איך אויפגעקומען מיט א ליסטע פון געדאנקען וואס דער פעטער קען ווען טוהן צו שפארן אפאר גרייצער, און מיט די צייט האבן גענוג געלט אפצוקויפן קרימיע פונעם רוסישן בער.

הנני מוכן ומזומן.

די תפיסות:

אלע פעדעראלע טורמעס וואס קאסטן אפ די גאווערמענט ביליאנען א יאר, זאל מען אויסליידיגן, און אויפבויען בארדזשעס אינמיטן וואסער א שטייגער ווי גוגל טוט, און דערמיט וועט מען שפארן אזוי:

1. סוער, און פלאמינג וועט זיין לרחצה בחנם אין כסף.
2. עסן קען מען די פיש, טרינקען קען מען דאס וואסער.

3 טראנספארטעישאן וועט מען נישט דארפן ווייל די בארדזשעס וועלן פארן און זיך שטעלן ביי יעדן בארטן אן אנדערן טאג.

4. מ’קען מינימיזירן די שומרים, און וועלכער ארעסטאנט עס וויל באגיין זעלבסטמארד, זאל מען צושטעלן א ספעציעלע באלקאן גענוג הויך פארן ריכטיגן עפעקט.

5. מ’זאל פארקויפן די טורמעס אדער פארדינגען פאר גוט געלט.

—

איי אר עס:

די אייער-עסערס זאלן זיך צונויף שמעלצערן מיט די פאסט אגענטור:

1. יעדער זאל צאלן א גראדן שטייער ביל וואס מ’קען אויף איין בלעטל מאכן אין א טיימס טעבל. (א שטייגער ווי די בוש פלאן)

2. די אייער עסערס זאלן אנשטאט זיצן אין גרויסע ווילאס באקומען מעיל טרעקלעך און אויפפיקן דאס געלט אין די פאסט קעסטלעך און איינוועגס דעליווערן די פאסט אויך. (אראפ מיט די פאסט אגענטור)

3. ווער ס’צאלט נישט זיין שטייער זאל מען נישט דעליווערן די פאסט.

4. ווער ס’צאלט אין צייט וועט באקומען די קיופאן’ס און מאגאזינען פון וואלמארט און קאהל’ס וכו’.

—

פאסט אגענטור:

ניעמא!!! געענדיגט!!! פיניטא!!! אלעס וועט די אייער עסערס טוהן.

גרעסערע פעקלעך וועט יו פי עס שיקן. און קלענערע פעקלעך אדער ענוועלאופס וועט מען שיקן דורך “געשיקט” אדער “קוויק”. איינוועגס וועלן אפאר אידן האבן פרנסה.

—

א וויכטיגע נקודה:

זייער וויכטיג וואלט געווען אז אלע פעדעראלע קאלקיולעטאר’ס און קאמפיוטערס זאלן ווערן אינסטאלירט מיטן סימבאל = וואס זאל אקטיוויזירט ווערן.

די מעלה דערפון איז פיהלפאכיג, אבער בעיקר ווען די פעדעראלע רעכענער און בודזשעט פירער וועלן דאס דרוקן און עס וועט זיי באמת ווייזן ווי אומסטאביל זיי זענען און ווי ווייט פארפארן פון רעאליטעט זיי זענען וואלט די גאווערמענט געשפארט אסאך געלט.

צוריק מיט די “איקוועל” סימבאל אויף גאווערמענט קאמפיוטערס.

—

מעדיקעיד:

א איינשטימיגע פארבאט אויף קרענק, און אראפ מיטן עקספענס.

כדי דאס צו עטאבעליזירן דארפן אריינגיין אין קראפט די פאלגענדע פארבאטן:

1. נישט עסן זאלץ, צוקער, פעפער, און אויל.
2. א פארבאט צו אריבערגיין די גאס ווען עס איז נאכט (קארפיו) כדי צו פארמיידן עקסידענטן.
3. קארס זאלן נאר קענען פארן אויף 45 מפ”ש.
4. אויפנעמען מיכאל בלומבערג אלס געזונטהייט מיניסטער פאר א דאללער א יאר.

—

פוד סטעמפס:

יעדער וואס נוצט נישט אויס דעם גאנצן קארטל זאל אריינגיין אין א גורל פאר האלב פון די פאט פון איבערגעבליבענע געלט.

—

דראגס

לעגאלעזירן דראגס
אויפלעזן די טויזנטער אגענטורן וואס באפאסן זיך דערמיט.

—

בקיצור נמרץ אויב וועט זיך די גאווערמענט צו מיר מעלדן וועל איך זיי אנווייזן נאך פיהלע פלעצער וואו זיי קענען שפארן אדער מאכן געלט. איך גיב נישט אלעס ארויס.