הנותן מתנה לחבירו (לכבוד פורים)

היינט איז דא ביי אונז אין ביהמ”ד א איינמאליגער געלעגענהייט! און עס איז ווערט אלעס איבערצולאזן פאר א צווייטס מאל און קומען כאפן די ארויסגליטשענדע מציאה!

פאר א נישטיגע שמירעכץ פון 260 גרינע פאפירענע דאלאררן באקומט איר א זעלטן שיינעם הויכן געפלאכטענעם אמה על אינטש 6 שפיציגער בינען וואקסענדיגער הבדלה בחינם!!!

גוט געהערט! ס’גאנצע איז אייער’ס בחנם אין כסף! איר קענט דערמיט טוען פארשידענע אקטיוויטעטן. ווי דער שמש אונזערער גיט איבער זענען דא וואס פארשטייען נישט דעם פוהלן ווערדע פון די גלאררייכע מתנה.

לאמיר עס צענעמען אויף קלענער געלט! (נישט דעם דיוס)

1. איר קענט עס נוצן צו הבדלה! דאן דארפט איר עס אנצינדן פון שפיץ. עס איז נאר א ווייטאג ווייל עס גייט אויס. ווי א ליכט!

2. איר קענט עס נוצן פאר וואקס אין די ברעיסעס פאר די וואס האבן ברעיסעס. (פארשטייט זיך עס לוינט נישט פארדעם צו מאכן ברעיסעס ווייל עס נוצט זיך אויך אמאל אויס)

3. איר קענט עס אויפפלעכטן און דאן איבערפלעכטן אלס א כפול שמונה פלעכטער.

4. איר קענט עס האלטן אין אייער טלית בייטל! זאל יעדער זעהן אז איר זענט א “נארמאלער מענטש” און איר צאלט צייטליך.

5. (נישט לעגאלע אפציע-מיר נעמען נישט אחריות) איר קענט זאמלען א קאלעקציע פון 100 שטיק יעדע יאר איינס און עס פארקויפן צוריק פארן שמש פאר א פראפיט! (וואס מיינט איר פון וואו האט ער אזאפיל?)

אלנספאלס דארפט איר כאפן די הבדלה פאר די פוס און נישט פארפאסן אזא וואקסענעם געלעגנהייט!!!

דיסקלעימער: איך בין א מעמבער און צאל ערליך מעמבערשיפ. דאס אויבנדערמאנטע איז לוויציתא בעלמא!

א פרייליכן פורים