א דעבאטע מיט א ציהל

אין רושם פון א רייע זינלאזע דעבאטעס וואס איך האב לעצטנס מיטגעהאלטן, וואס פירן דעם זייגער אויף פענסיע, און מאכן פארגעסן אז צייט האט א ווערדע. ברענג איך אראפ איינס פון געציילטע דעבאטעס וואס האבן יא געפירט צו א גוטע ענדע.

דער דעבאטע איז געווען (האט געקענט זיין) צווישן צוויי אידן וואס איך קען נישט ביים נאמען, דעריבער וועל איך לאזן די נעמען ליידיג.

א – לאמיר זיך מפלפל זיין.

ב – אויף וואס?

א – זאג דו!

ב – פון מיין זייט וואס דארפן מיר זיך מפלפל זיין? וואס איז שלעכט אזוי?

א – וואס דארפסטו אלס זיין פארקערט פון יעדן? איך זאג דיר אז איך וויל זיך מפלפל זיין און דו ביזט גראד אויף דעם פארקערטן מיינונג.

ב – זיי זיך מסביר, איך האב נישט וואס צו קריגן מיט דיר, פארוואס זאל איך זיך זוכן סתם אן קיין סיבה?

א – דאס איז דאך וואס איך פרעג! פארוואס דארפסטו אלס טוהן פארקערט?

ב – נו שוין וועל מיר זיך דעמאלס מפלפל זיין. געגאנגען. ווער הייבט אן?

א – ווער הייבט אן וואס?

ב – דעם פלפול.

א – וואס עפעס? איך האב געזאגט עפעס קעגן דיין מיינונג?

ב – ניין! נאר דו ווילסט דיך מפלפל זיין, נישט דאס שרייסטו?

א – אויף וואספארא נושא זאל איך זיך מפלפל זיין מיט דיר?

ב – וואס הייסט וואס? איך ווייס דען? דו האסט פארפירט אז דו ווילסט א פלפול.

א – וואספארא מין ברי’ ביזטו? דו האסט נישט קיין שום לעגיטימע טענה קעגן מיר, אבער מפלפל זיין ווילסטו נאך אלס.

ב – איך וויל דען? דו ווילסט!

א – און אז איך וויל? ביזטו אלס אזא גוטער, צו טוהן וואס איך וויל? און אז איך וועל דיר בעטן א הלואה וואלטסטו מיר געגעבן? נאר ווייל איך וויל?

ב – ווער זאגט אז נישט?

א – נו וואס הייסט, דו ווילסט מיך איינרעדן אז אויב בעט איך דיר א הלואה פאר 10 טויזנט טולער, וואלטסטו מיך ערנסט אין באטראכט גענומען, פונקט ווי מיין פארשלאג פאר א פלפול וואס דו האסט אזוי שנעל אנגענומען?

ב – אודאי אזוי!

א – נו, שטעל אויס דעם טשעק צו סיטי בענק! איך וועל דיר עס באצאלן אין פעימענטס.

אטע דאס הייסט א דעבאטע מיט תכלית!

האטס מיר א גוטע נאכט.
האטס מיר א גוטע נאכט!