פארוואס איך גיי שטימען

דער אמת איז אז אלס אמעריקאנער בירגער וועלכער נעמט נישט פונעם פעטער, נאר גיבט פאר די מומע, האב איך זעלטן ווען אויסגענוצט מיינע בירגער רעכטן, ווייל גיין שטימען איז קיינמאל נישט געווען פון מיינע פריאריטעטן אפילו ווען מ’האט געדרוקט אויף צעטלען גאנץ “עזרת אבותינו” מיט די מפרשים.

איך זאג נישט ח”ו אז מ’זאל מיך נאכטוהן אין דעם הינזיכט, עס איז געווען פריוואטע נגיעות און מניעות, פארוואס כ’האב נישט. געקענט טוהן די מצוה, אבער איך פלעג אלס נעמען א תהלימ’ל און מתפלל זיין אז ס’זאל ח”ו נישט זיין קיין פראבלעם פאר מיינע דורות, ווי די צעטלען פלעגן קלאר שרייבן אז דאס איז ח”ו אן ערנסטער חשש.

ב”ה אז דאס מאל האב איך יא געקענט מקיים זיין דעם צו השעה און געגאנגען שטימען בדחילו ורחימו מיט א לשם יחוד זיך מצטרף זיין מיט אן אחדות צוריק צו שלאגן די גרויזאמע פאליטישאן’ס וועלכע ווילן ל”ע דאס ארגסטע, און שטעלן אן ערנסטן געפאר פארן כלל ישראל.

אלנספאלס בין איך דאס ערשטע מאל אריין אלס שטים בארעכטיגטער בירגער, אינעם שטים לאקאל, זיך גרייטנדיג צו נעמען דעם מערקווידיגן שריט.

איך שפאציר אריין און קוק זיך אום, עס ווערט מיר שווארץ פאר די אויגן! שווארץ תרתי משמע, פוהל מיט פאליציי, און מיט “שחורות צועקות” יעדער שרייט און פארפירט, נאר צו מיר שמייכלט יעדער! מ’ווייזט מיר אן וואו צו גיין, פאליציאנטן באגלייטן מיך, איינע שרייט אפילו אן א יונגן גוי וואס איז געשטאנען צו נאענט צו מיר אז ער מאכט מיך אומבאקוועם אלס א וואוטער. איך שפיר זיך ווי א מיליאן דאללער.

מ’גיבט מיר א גרויסן ענוועלאופ מיט דאקומענטן, איך קנייטש איין דעם שטערן, יעדער ווארט דאך צו זעהן מיין באשלוס, און מ’וויל הערן מיין מיינונג יעצט איין מאל.

אה פאר איך פארגעס, מ’הייסט מיך אונטער שרייבן מיין נאמען, און פון די אנדערע זייט דעקט מען צו דעם איבריגן חלק פונעם ביכל אז איך זאל נישט קענען “טשידן” וויאזוי צו אויסשרייבן מיין נאמען. (איך האב געפעסט די טעסט ב”ה)

מ’גיבט מיר א פריוואטע ווי איי פי בודקעלע צו אפשרייבן מיינע געדאנקען און נאטיצן, און דערנאך אויף א רויטן קארפעט גיין צעשפרייטן מיין מיינונג…

איר ווילט וויסן פארוואס איך גיי שוין אייביג פרובירן צו גיין שטימען; איינמאל אין פיר יאר איז גוט צו שפירן ווי יעדער רעכנט זיך מיט מיין מיינונג, און מ’זאל מיר געבן פאליצייאישע וואך און אזויפיל כבוד.

ס’האט זיך אלעס געלוינט!!!