זאלציפידיע – שאפליפטינג

אין איינע פון מיינע נייעסטע פראיעקטן קום איך ארויס מיט א נייעם אוצר פון ווערטער און באגריפן, מיט זייערע אנגענומענע טייטשן און אויסגעטראפענע מיינונגען. איך וועל אייך פרובירן מיטצוטיילן דא און דארט איבער די פראגרעסס פונעם “זאלציפידיע”.

– שאפליפטינג –
-Shoplifting-

אין אמעריקא הייסט שאפליפטינג ווען א פערזאן נעמט אראפ פון די שענק אין א געשעפט א חפץ און פרובירט ארויסצוגיין אומבאצאלט דערמיט.

עס מיינט אלעמאל אז יענער “פרובירט”, עס געלונגט נאר נישט אלס.

אין חסידישן ענצייקלאפידיע איז “שאפליפטינג” א וועכנטליכע און אמאל (ביי די גליקליכערע) א מאנאטליכע דאזע פון טראגן די אשת חייל זיך אויס”לופט”ערן, דורך א מעטאד וואס ווערט גערופן “שאפ”ינג.

שאפינג איז אין די גויאישע וועלט אנגענומען אלס אן אויסדרוק פון גיין איינקויפן. עס איז אין די אידישע וועלט געווארן פארקירעוועט צו א סארט אויסלופטעריי וואס ענדיגט זיך צומאל מיט א אומדערהערטע שפענדעריי.

עס איז נישט קיין חובת חפצא, אז מ’דארף דעם חפץ, נאר א חובת גברא, אז מ’דארף זיך לופטערן.

-מאדנע-

עס איז אין ווארהייט א גאר מאדנע מהלך צו שעפן לופט אין א פארדאמפטן האום דיפאו אדער וואלמארט, אבער עס איז א מנהג וואס פארטראגט נישט קיין דרושים.

אזוי צו אזוי, אין יעדן שפראך איז עס א “פארברעכן”.

(זאלציפידיע – ערך ש’)